Intervistat

Shumë vajza do të donin ta njihnin, ta takonin edhe pse jo ta dashuronin. Meqënëse i këndon kaq shumë dashurisë, besohet se di të dashurojë ashtu si në këngë, dhe siç ëndërrojnë vajzat. por ja që këtej e tutje kjo do t‘u mbetet vetëm një obsesion, sepse Redonin prej tyre e ka zënë frika . Kantautori i cili njihet për dobësinë që kanë vajzat ndaj tij, ka marrë shpesh nga bujaria e dashurisë së tyren, deri diku e parefuzuar. Por ja që mungesa e reciprocitetit ka bërë që padashur ai të ndjeje neveri nga këto të dashuruara, që nuk mundet t‘i dojë , dhe mbërrin momenti kur … Mjaft më ! Gjithë kjo përvojë, e mbledhur veçanërisht në adoleshencë i kanë dhënë atij mësimin se vajzat e panjohura përbëjnë rrezik e, mbi të gjitha, rënia në dashuri me to është paksa e vështirë. “ Nuk më ka ndodhur ndonjëherë që të dashuroj vërtet fanse dhe, përderisa nuk i ndjej, nuk dua të krijoj asnjë raport, qoftë edhe të vogël me to, perveç respektit " „ thotë Redoni, duke pohuar kështu lidhje të dikurshme, por që tashmë i ka reduktuar veç në miqësi të vjetra. Ndërsa propozueset e reja per “ njohje „ janë të paracaktuara për të qënë thjesht të njohura, të cilave nuk iu zgjatet shumë shoqëria. Sa për dashuri me to as që mund të bëhet fjalë. tashmë ai është 30 vjeç dhe kanë kaluar kohët kur fluturonte tërë eufori pas trilleve të ëmbla dashurore.

“ Jam bërë mjaft i kujdesshëm në të tilla gjëra „, vijon tregimin rreth jetës private kantautori. Problemi i tij më i madh për momentin nuk janë gocat por … çunat. Domëthënë ata që u rrinë në krah fanseve të Redonit. I qëllon që duke kaluar rrugës, ndoshta i përqëndruar se di ku, por patjetër me një shikim të butë e paqësor prej artisti, rrezatimi i ngrohtë i vështrimit t‘i përthyet në sy mashkullorë plot shkëndija urrejtjeje dhe sfide. “ Ajo që mund të kuptoj unë është se ndoshta partneret e këtyre çunave shfaqin ndonjë simpat për këngët e mija, apo për mua „, thotë Redoni duke përkulur kokën me një shprehje pafajësie krejt fëmijërore në fytyrë “ Ndoshta vajzat gjejnë diçka romantike, veçanërisht tek tekstet e këngëve, dhe kjo i lidh shpirtërisht „, mendon ai.

Dhe mblidhen shumë shkaqe që e shtyjnë për të hequr dorë së shpejti nga romantizmi i tij i tepruar. Këtëj e tutje ka vendosur që notat e trishtimit t‘i ketë më të pakta. Dhe një shkak për këtë janë bërë edhe njerëzit, të cilëve, kësisoj Redoni iu përgjigjet me një natyrë pak të dobët dhe fatkeqe, kur e vërteta nuk është aspak ashtu. Ai e di që është mjaft i ndjeshëm, por jo i dobët. Kështu, paksa i latuar edhe nga opinjoni, ai do të përpiqët të “forcohet „ më shumë, por pa rreshtuar së shkruajturi për dashurinë. Sepse si për çdo njeri edhe për të kjo është ndjenja më e bukur njerzore.

Ka mbetur vetëm nami se jemi të shthurrur. Unë kur lidhem me dikë dhe jo vetëm unë. Por edhe shokët e mi, jemi besnikë „ , rrëfehet Redi. Ai thotë se dashuron, se ka një mik e, dhe që është besnik ndaj saj. Madje del fare i sinqertë teksa thotë se : “ Ka ndjerë disa herë, por asnjëherë dashuri të madhe „. Megjithatë martesa është një projekt që i rri përherë e më shumë në kokë. Ndjen pak frikë se mos ndoshta fëmijët dhe gruaja do të jenë një përgjegjësi e madhe, që do ta shkëpusë disi nga krijimtaria, por megjithatë e di që nuk mund t‘i shmanget dot. Tashmë ai e sheh vehten në një moshë të duhur edhe për ngjarje të tilla. Është i ndërgjegjësuar për këtë por fillimisht duhet të krijojë disa kushte financiare, e domosdoshmërisht të ketë një shtëpi . Ndërsa kush do të jetë gruaja e ëndërrave të djalit të vetëm të Makashëve, të cilët ia shfaqin gjithmonë këtë dëshirë të birit, ai nuk thotë gjë, vetëm se do të mendohet shumë mirë për të bërë zgjedhjen e duhur. Dhe, me sa duket, ajo nuk ka për të qenë nga bota artistike, pasi marrdhëniet në këtë fushë i paraqet thuajse të ndara nga një hendek. Ai artistëve u qëndron paksa larg. Kjo i vjen ngaqë është pak i mbyllur. Asnjëherë nuk ka pasur një lidhje dashurie me ndonjë artiste, duke mohuar kështu edhe ato thashetheme që qarkullojnë për dhembjen e dashurisë së tij për një këngëtare të larguar jashtë Shqipërisë

Tani është duke punuar për një album të ri, së bashku me Aleksandër Gjokën dhe Elton Dedën, që janë njëkohësisht edhe miqtë e tij më të mirë. Veç kësaj edhe për nje album vetiak, ku në një këngë të veçantë do të përfshijë edhe bashkëpunëtoren e tij të hershme Mira Konçi. Këngët do të jenë të gjitha thuajse të reja. Por dyert e sponsorëve të shumtë, ku i është dashur të trokasë, e kanë lodhur së tepërmi. Në Shqipëri nuk mund të jesh një artist i pasur. “ Sa herë shkojmë jashtë na shohin më sy lakmitarë, sepse këngëtarët janë kudo të pasur, por për ne s‘është aspak ashtu „, thotë Redoni me keqardhje. Mjaft shqetësuese mbeten disa probleme që nuk i mbart vetëm ai, por të gjithë artistët, si p.sh. e drejta e autorit, radiot private që nuk bëjnë asnjë reklamim të këngës shqiptare, duke ua pakësuar njohjen etj. Probleme tani për tani ka me tekstin, sepse shqipja i duket shumë e vështirë për t‘u përshtatur në tekst. Megjithëse tekstet i krijon vetë, ka vite që leximin e ka braktisur. Dikur lexonte shumë, por për fat të keq tani po i ngjet e kundërta. Punon vazhdimisht dhe pauzat e pushimit nuk zgjasin më shumë se një javë, por edhe këto të rralla. Pastaj nis sërish puna. I ndodh që një këngë mund t‘i lindë në kokë edhe diku larg pianos. E mban mend dhe pastaj ulet mbi tastierë. E ndjen se ka shumë për të bërë dhe profesionit të tij nuk do t‘i ndahet kurrë, sikur edhe Shqipërisë.

Nëse lë takim me Redonin sigurisht që do të të duhet gjithmonë që ta presësh, sepse ai ka një huq të keq, vonesën. Edhe pse përpiqet e shtrëngohet maksimalisht që të vijë në kohë gjithmonë nuk ia arrin. Sapo e sheh të zbresë nga makina e tij e vogël, me kuriozitetin e natyrshëm të takimit nga afër, pavarësisht se e njeh nëpërmjet ekranit, vë re çdo detaj. Fillimisht dallon një lloj hijeshije që shoqëron veprimet e zakonshme që kryen. Të bie në sy veshja e tij sportive, nje bluzë e bardhë pambuku dhe pantallonat e zeza pak të bollshme, gjithashtu sportive, me të cilat duket se ndihet komod. Flokët e errët, paksa të dendur që i bien mbi fytyrë, ndoshta janë bojatisja e një lloj hiri dhe e sadopak misteri në fytyrën e tij. Pastaj afrohet me një ecje të lirshme dhe pamje miqësore, kerkon të falur për vonesën, pasi “ fajin e kishte trafiku „. Pastaj sinqeriteti e mund turpin dhe del se veç trafikut ky është dhe një nga huqet artistike të tij. “ Edhe kur kam qenë në shkollë, gjithmonë shkoja me pak vonesë dhe ky zakon më ka mbetur edhe sot. Rropatem që të jem në orar dhe përsëri dështoj. Në këtë pikë jam i pandreqahëm „, shton Redi. Në të kuvenduar dallon një ton miqsor, xhentilesë të natyrshme, thjeshtësi dhe butësi. Të krijon përshtypjen e një djali të qetë, pak të tërhequr që nuk hapet lehtë, që krijon pauza përpara se të përgjigjet, që di t‘i ruajë sekretet e tij. Në ndryshim nga miqtë e tij më të mirë, Sandri dhe Toni, ai nuk pi asgjë përveç lëngjeve freskuese. Madje ndjehet i frustruar , sa herë që ata pijnë dhe kundërmojnë era alkol. I cituar ndonjëherë si i suksesshem me vajzat, ndoshta deri në tepri, ke një lloj paragjykimi ta gjesh atë pamje që ta jep këtë domethënie, duke shmangur paksa ndonjë lloj ëngjëllësie që mund të ketë pasur dikur. Por këtij dyshimi Redoni i përgjigjet me pamjen e një fëmije të padjallëzuar, plot ideale. që ende ëndërron diçka tjetër, larg kotësirave që të velin, një dashuri të madhe që s‘e ka gjetur dhe këngë më të bukura se ato që ka krijuar.