Intervistat

“Të përqëndrosh gjithësinë në një person do të thotë dashuri „ – Këshu thoshte Viktor Hygoja për dashurinë. Në “ Oazën e Paqes „ momentalisht dashuria matet me fishekë !? Deri kur ? Pyetje e cila na rrotullohet nëpër kokë. Ku mbeti dashuria në tërë këtë kaos ? Ku mbeti e bukura ? Dikur …

3NDI : Redon Makashi në Tetovë …

Redoni : Unë kam ardhur shumë herë në Tetovë, kësaj rradhe erdha për të gjetur sponsorizues për albumin tim të parë, ta bëj shumfishimin e tij si dhe të pregatis kopertinën.

3NDI : Në Shqipëri nuk gjetët sponsorizim !?

Redoni : Në Shqipëri kisha një përkrahje të madhe nga “ VEFA „ ( produksion muzikor ), por në këtë kohë firmat e këtij lloji nuk funksionojnë. E tërë puna më ngeli e përgjysmuar, kështuqë isha i detyruar të vij këndej kufirit. Pastaj në Shqipëri sa i përket çështjes së dizenjit dhe shumfishimit, nivelit të teknikës ende nuk kanë ardhur në këtë shkallë që janë tek ju.

3NDI : Bëhet fjalë vetëm për teknikën ?

Redoni : Po. Atje kemi mjaft njerëz të talentuar dhe profesionistë të këtyre sferave, por ja që kushtet janë të tilla …

3NDI : Në këtë drejtim sa mendoni se do të korrni sukses këtu ?

Redoni : Me Maqedoninë, gjegjësisht me Tetovën mua nuk më lidh vetëm puna. Unë këtu kam shumë miq, të cilët më kanë ndihmuar edhe gjatë inxhizimeve të cilat i bëra në Shkup. Prandaj nuk dyshoj fare

3NDI : Në Shqipëri është vështirë t‘i shohësh të gjithë ata gjëra që ndodhën …

Redoni : Të them të drejtën kjo ishte një gjë që unë s‘e prisja ( një frymëmarrje e thellë ). Megjithkëtë unë kam shpresë se gjithëçka do të rregullohet dhe se një gjë e këtillë s‘do të përsëritet kurrë.

3NDI : Erdhët në Tetovë e këtu hasët përsëri në policë të armatosur, në provokime …

Redoni : Kur u zgjova në mëngjes dola jashtë, pashë gjithë ata policë … nuk e di, më duket se këto gjëra na ndjekin neve. Këtu gjendja është pakëz më e vështirë, por na ngelet të shpresojmë …

3NDI : Vetëm disa ditë më parë në Sheshin e Qytetit u mbajt mbajt një koncert me moton “ Rinia Bastion i Papushtueshëm „ …

Redoni : Ky manifestim është mbajtur edhe vitin e kaluar. Po në të njëjtën ditë ne mbanim një koncert në Stadiumin e Qytetit, e pastaj me Aleksandër Gjokën, Manjola Nallbanin dhe Ardit Gjebrenë morëm pjesë në një mbrëmje e cila ishte qe organizuar në hotelin “ Maqedonia „ kështu që nuk morëm pjesë.

Kësaj rradhe kaluam shumë bukur. Përshëndes iniciativat e këtij lloji, u japin rast artistëve shqiptar të të gjitha trevave të komunikojnë mes veti, të ndrojnë mendime, shpesh herë nëpër manifestime të këtilla lindin dhe idetë për bashkpunim. Me një fjalë duhet më shpesh të organizohen gjëra të këtilla, si këtu ashtu edhe në Shqipëri, Kosovë …

3NDI : Disa prej këngëve tuaja i kemi dëgjuar në manifestime të ndryshme, ç‘ndodh me albumin ?

Redoni : Albumi im i parë është gati, është inxhizuar dhe tani pret shumfishimin. Titullohet “ Dikur … „

Përbëhet prej 9 materialeve. Siç cekëm edhe më parë, për shkak të gjendjes në Shqipëri, ai atje do të del më vonë. Përsa i përket Maqedonisë shpresoj se këtu do të del pakëz më herët, por përsëri e tërë puna varet nga sponsorët.

3NDI : Redoni, kitara – një lidhje kisha thënë e pandërprerë. Mësuesi i juaj në kitarë ?

Redoni : Kjo pyetje më ngjallë shumë kujtime … Unë nuk kam mbaruar për kitarë, kam mbaruar fakultetin për kalarinet, në të njëjtën kohë kam vazhduar edhe pianon me ca pedagogë në institut, ndërsa për kitarë nuk mund të them se jam profesionist. Atë e kam mësuar me shokët …

3NDI : C‘ kuptim ka muzika për ju ?

Redoni : Unë nuk mund të ndahem dot nga muzika …

3NDI : Ëndërra e Redonit :

Redoni : Njeriu në jetë ka shumë ëndërra. Ca prej tyre i realizon e ca ngelin vetëm si ëndrra. Ëndërra ime qysh si fëmijë ka qenë muzika, besoj se atë e kam realizuar. Megjithatë njeriu vazhdon të ëndërrojedhe më tej …

3NDI : Folëm për ëndrrën, tash i kthehemi realitetit ?

Redoni : Në Shqipëri gjendja është më ndryshe se këtu. Atje deri diku ka kontroll mbi nxjerrjen e albumeve, këngëve. Këtu kam vërejtur se ky kontroll s‘ekziston, kam hasur në një muzikë të çuditshme e cia s‘besoj se mund të preferohet në Shqipëri. Është e çuditshme se këtu njerzit e moshës më të vjetër e preferojnë atë, ndërsa rinia duan diçka ndryshe, ata preferojnë grupe si Elita 5. mendoj se me kalim e kohës edhe kjo do të zhduket

3NDI : C‘ka ju frikëson ?

Redoni : Mos të ngelim sakata ( ha ha ha )

3NDI : Shpresojmë se jo. A kishit bërë ju muzikë komerciale ?

Redoni : Për album nuk e kisha bërë kurrë. Për album mundohem gjithmonë të bëj muzikë sa më profesionale, kurse kështu sa për ndonjë mbrëmje apo diçka të tillë ndoshta.

3NDI : Njerëzit zakonisht mbajnë dikënd për idol, e pastaj ndjekin hapat e tyre, kush është idoli juaj ?

Redoni : Në kohën e adoleshencës sime më kanë pëlqyer shumë “ Beatles „ -at. Natyrisht më pëlqejnë prap. S‘mund t‘i hedh poshtë, kurse tani më pëlqejnë shumë “ Dire Straits „

3NDI : Cka mendoni për revistën tonë “ 3NDI „ ?

Redoni : Revista të cilën e punoni ju më pëlqeu shumë, megjithëse ishte numri i parë, në të vërejta shumë profesionalizëm, kishte mjaft gjëra interesante, kuriozitete, gjëra që njeriun me të vërtetë e freskojnë në këto kohë të vështira. Ju dëshirojë sukses !

3NDI : Ju faleminderit !